Elías Querejeta Zine Eskolak, Kontadores Gazte Zentroarekin batera, zine-programa bat aurkeztu du, Lucía Dellachak antolatua. Lau ostiraletan egingo da, 2023ko urriaren 20tik azaroaren 10era, eta Argentinako emakume zinemagileen lanak eskainiko ditu.
Zikloak ikuspegi feministatik eta belaunaldiz haraindiko ikuspegitik esploratzen ditu filmak, eta Argentinako gaur egungo zinema erakusten digu, Melisa Liebenthal, María Alché eta Clarisa Navas bezalako zuzendarien lanen bidez. Aldi berean, elkarrizketa bat sortzen du funtsezko figuren obrekin, hala nola María Luisa Bemberg, Narcisa Hirsch, Lucrecia Martel eta Albertina Carri. Tabakalerak eta Bendita Tú Festival jaialdiak babesten dute zikloa.
Dejemos que la casa se ensucie zikloarekin, 70eko hamarkadatik gaur egunera arte Argentinako emakume errealizadoreen film batzuetan murgiltzen gara, hainbat genero arakatuz: fikzioa, fikzioa ez dena eta genero esperimentala. Lan horietan, errealizazioari eta ekoizpenari buruzko hurbilketa desberdinak elkartzen dira, guztiak ere etxeko espazioa, barru-barrukoak diren gauzak eta egunerokoa esploratzeko ikuspegi eta planteamendu berri batekin, gizonezkoen mainstream zinemako narratiba nagusiei desafio eginez.
Zikloa María Luisa Bembergen Señora de nadie (1982) filmarekin inauguratuko da. Film horrek emakumearen egoerari buruzko kezka politikoa islatzen du, bereziki etxekoandrearen estereotipoa bizi duen emakumearena, gizarte patriarkalak ezarritako erantzukizunetan eta itxaropenetan harrapatutakoarena. Filmak Leonor irudikatzen du. Etxekoandre tipikoa da, eta senarra desleiala dela konturatzen denean, etxetik alde egitea, seme-alabak senarraren zaintzapean uztea eta bizitzan beste aukera bat bilatzea erabakitzen du.
Bigarren saioan, Seguro que Bach cerraba la puerta cuando quería trabajar (1979), Narcisa Hirschena, eta Las Lindas (2016), Melisa Liebenthalena, proiektatuko dira. Garai eta estilo desberdinetakoak izan arren, bi filmak emakumeen ikuspegiari, hegemoniari, edertasunari, gorputzei eta sexualitateari buruzko esperimentu dokumentalak dira, adiskidetasunaren unibertso intimotik abiatzen direnak.
Hirugarren ostiralean, Lucrecia Martelen Rey muerto (1995) eta María Alchéren Familia Sumergida (2018) proiektatuko dira. «Ama familiakoa»ren rolaren problematikari helduko zaio, bidaiak eta doluak zeharkatzen dituzten bitartean, eta beren buruari desafio egiten dioten bitartean, ohiko erosotasunaz harago, iruditeria oniriko eta itogarriak esploratuz. Bi zuzendari horiek proiektu batzuk partekatu dituzte eta elkarrekin lan egiteko lotura berezia dute.
Azken saioan, film hauek emango dira: Barbie también puede estar triste (2001), Albertina Carrirena, Hoy Partido a las 3 (2017), Clarisa Navasena. Film horiek aukera ematen digute gaur egungo emakumeen amodioak eta sedukzioak arakatzeko, eta, aldi berean, zalantzan jartzen dituzte generoari eta sexu-orientazioei buruz ezarritako gizarte-presioak, homofobiari eta transfobiari aurre eginez. Carriren film laburrak agerian jartzen du «Barbie» motako panpinen mundu liluragarria. Navasek, berriz, Las Indomables futbol-taldea erakusten digu, beren auzoan egindako emakumeen futbol-txapelketa kaotiko eta gaizki antolatuan.
Dejemos que la casa se ensucie. Argentinako zinemagileen zikloak ikusleak gonbidatzen ditu zinemara hurbiltzera eta Kontadores Gazte Zentroaren espazioa aktibatzera, filmen proiekzioetan, hitzaldietan, eztabaidetan eta deialdietan parte hartuz. Horrelako jarduera zinematografikoetarako zentroak duen egokitasuna nabarmendu nahi dugu, ikuspegi feminista, irisgarri, plural eta hedakor batetik. Gainera, Argentinako eta munduko beste leku batzuetako filmak ezagutzeko aukera ematen digu. Bestalde, gure ustez oso garrantzitsua da kulturaren egoitza hori aldarrikatzea, ekitaldi guztiak Donostiako hiriburuan zentralizatu ez daitezen. Horrela, artea eskuratzeko aukera gehiago emango dugu eta eztabaida aberasgarriak sortuko ditugu biztanleen artean.
Programa
Ostiralean, 2023/10/20an, 19:30ean
Señora de nadie (1982), María Luisa Bemberg (1h38min) / PUBLIKO GUZTIENTZAT
Ostiralean, 2023/10/27an, 19:30ean
Seguro que Bach cerraba la puerta cuando quería trabajar (1979), Narcisa Hirsch (27min) / PUBLIKO GUZTIENTZAT
Las lindas (2016), Melisa Liebenthal (1h17min) / PUBLIKO GUZTIENTZAT
Ostiralean, 2023/11/3an, 19:30ean
Rey muerto (1995), Lucrecia Martel (12min) / PUBLIKO GUZTIENTZAT
Familia Sumergida (2018), María Alché (1h31min) / PUBLIKO GUZTIENTZAT
Ostiralean, 2023/11/10ean, 19:30ean
Barbie también puede estar triste (2001), Albertina Carri (22min) / +18
Hoy Partido a las 3 (2017), Clarisa Navas (1h36min) / PUBLIKO GUZTIENTZAT
Saio guztiak 19:30ean hasiko dira. Sarrera doakoa izango da eta edukiera bete arte.
Lucía Dellacharen biografia
(1994, Buenos Aires). Ekoizlea, zuzendaria, argazkilaria eta kuradorea Las Furias Zineman. Buenos Aires eta Donostia artean bizi da. Argentinako Zinearen Unibertsitateko argazkigintza-zuzendaritzan trebatua, film eta serie luzeetan lan egin du, besteak beste, Mara Pescio, Fernando Meirelles, Mateo Bendesky eta Martín Piroyansky zuzendariekin. Gaur egun, EQZEren Komisariotza Zinematografikoaren Masterra ikasten ari da.
